ಕುಂದಾಪುರ ಇತಿಹಾಸ ಪ್ರಸಿದ್ಧವಾದ ಸಯ್ಯಿದ್ ಮುಹಮ್ಮದ್ ಯೂಸುಫ್ ವಲಿಯುಲ್ಲಾಹಿ (ರ) ಉರುಸ್ ಕಾರ್ಯಕ್ರಮ

ಕುತುಭೇ ಕುಂದಾಪುರ ಸಯ್ಯಿದ್ ಯೂಸುಫ್ ವಲಿಯುಲ್ಲಾಹಿ ( ಖ.ಸಿ) ರವರು. ಸ್ವಹಾಬಿಗಳ ಧರ್ಮ ಬೋಧನೆಯ ನಂತರ ಕುಂದಾಪುರದ ಜನತೆಯ ಆಧ್ಯಾತ್ಮಿಕ ನಾಯಕರಾಗಿದ್ದರು.

ಕುಂದಾಪುರ ನಗರದಿಂದ ತುಸುದೂರ ಕ್ರಮಿಸಿದರೆ ಅವರ ಭವ್ಯವಾದ ದರ್ಗಾ ಶರೀಫ್ ಮನಸ್ಸಿಗೆ ಮುದ ನೀಡುತ್ತದೆ. ಕುಂದಾಪುರದ ಸುತ್ತ ಮುತ್ತಲ ಜನತೆಯ ಆಶಾಕಿರಣವೂ ಸರ್ವ ಧರ್ಮೀಯರ ಸೌಹಾರ್ದ ಕೇಂದ್ರವೂ ಆಗಿರುವ ಈ ದರ್ಗಾ ಶರೀಫ್ ಪೂರ್ವ ಕಾಲದಿದಲೇ ಈ ಪ್ರದೇಶದ ಸುತ್ತ ಮುತ್ತಲಿಗೆ ಆಧ್ಯಾತ್ಮಿಕತೆಯ ಕಂಪನ್ನು ಪಸರಿಸಿದ ಆಧ್ಯಾತ್ಮಿಕ ಕೇಂದ್ರವಾಗಿತ್ತು. ಅವರ ಎಲ್ಲಾ ಸಮಸ್ಯೆಗೆ ಪರಿಹಾರ ನೀಡುತ್ತಿದ್ದ ಆಶಾ ಕೇಂದ್ರವಾಗಿತ್ತು. ಯೂಸುಫ್ ವಲಿಯುಲ್ಲಾಹ್ (ಖ.ಸಿ) ರವರು ಮೂಲತಃ ಲಕ್ಷದ್ವೀಪದವರು. ಅವರ ತಾತ, ಮುತ್ತಾತಂದಿರೆಲ್ಲ ಮಹಾನ್ ಅವುಲಿಯಾ ಗಳ ಪರಂಪರೆಗೆ ಸೇರಿದ ವರು. ಅವರ ತಂದೆ ಲಕ್ಷದ್ವೀಪದಲ್ಲಿ ಅಂತ್ಯ ವಿಶ್ರಾಂತಿ ಪಡೆಯುತ್ತಿರುವ ಖಾಸಿಮ್ (ರ.ಅ)ರವರು ಲಕ್ಷದ್ವೀಪದ ಜನತೆಯ ಬಹು ದೊಡ್ಡ ಆಧ್ಯಾತ್ಮಿಕ ನಾಯಕರಾಗಿದ್ದರು. ಅಸಂಖ್ಯ ಅದ್ಭುತ ಪವಾಡಗಳು ಅವರಿಂದ ಪ್ರಕಟವಾಗಿ ದ್ದವು. ಹೆರಿಗೆ ನೋವಿನಿಂದ ಬಳಲುತ್ತಿರುವ ಸ್ತ್ರೀಯರಿಗೆ ಅವರ ದರ್ಗಾದ ಹತ್ತಿರವಿರುವ ಬಾವಿಯ ನೀರನ್ನು ಕುಡಿಸಿದರೆ ಅಥವಾ ಅವರ ಮೇಲೆ ಯಾಸೀನ್ ಓದಿದರೆ ಅವರ ಪವಾಡದಿಂದ ಸಹಜ ಹೆರಿಗೆಯಾದ ಅದೆಷ್ಟೋ ಅನುಭವಗಳಿವೆ.

ಒಮ್ಮೆ ಅವರು ವಝೂ (ಅಂಗಸ್ನಾನ) ಮಾಡುತ್ತಿದ್ದಾಗ ಕಾಗೆಯೊಂದು ಅವರ ಮೈ ಮೇಲೆ ಮಲಿನ ಮಾಡಿತು. ಇದು ಕಂಡು ಅಸಮಾಧಾನಗೊಂಡ ಅವರು ಇಲ್ಲಿ ಕಾಗೆಯೇ ಬೇಡ ಎಂದರು. ಅವರು ಹಾಗೆ ಹೇಳಿದ್ದೇ ತಡ, ಅಂದಿನಿಂದ ಇಂದಿನವರೆಗೂ ಅವರು ಅಂತ್ಯ ವಿಶ್ರಮ ಪಡೆಯುತ್ತಿರುವ ಕವರತ್ತಿ ದ್ವೀಪದಲ್ಲಿ ಒಂದೇ ಒಂದು ಕಾಗೆಯಿಲ್ಲ!! ಕಾಗೆ ಸುಳಿದಾಡದ ಅಪರೂಪದ ದ್ವೀಪ ಎಂಬ ಖ್ಯಾತಿ ಈ ದ್ವೀಪಕ್ಕಿದೆ.